ខ្មែរសង្ឃឹមខ្មែរ

 

បងប្អូនខេមរៈកម្ពុជរដ្ឋ                                 ជាប់ពូជពង្សនគរវត្តរដ្ឋអស្ចារ្យ

សូមអ្នកផ្ចង់តម្រង់ខ្លួនក្នុងធម៌អាថ៌             ជាបុញ្ញាភិសង្ខារតទៅមុខ     ។

តែកុំភ្លេចកសាងផ្លូវឲ្យកូនចៅ                    ដែលគ្នានៅឯខាងក្រោយឲ្យបានសុខ

ដោយសារថ្វីការពិសីដែលធ្វើទុក              ឲ្យថ្កើងមុខកុំបីជាអាយ័តគេ     ។

ជនខាងក្រោយសុខទុកដោយជនខាងមុន    ជនខាងក្រោយនឹកព្រះគុណពុំភ្លេចទេ

បើជនមុនទុកកេរ្តិ៍គុណប៉ុនសាគរេ            តែបើគ្មានគុណកោះកេរ្តិ៍គេសូនឈឹង ។

ខ្មែរទាំងជាតិបើមារយាទខ្លាចតែស្លាប់     ខ្មែរនឹងអាប់សព្ទនឹងហីនគ្មានគេដឹង

តែបើខ្មែរប្រថុយស្លាប់រួចចាប់ប្រឹង           តស៊ូនឹងឧបសគ្គដោយវិទ្យា ។

ខ្មែរគង់រស់មានកំពស់ដូចជាតិគេ            ច្នេះខ្មែរមេឬមានធនមានប្រាជ្ញា

នាំខ្មែរតូចកសាងពូជឲ្យថាវរា                   ក្នុងឥឡូវឥឡូវណា, លាសិនហើយ  ។

ឃុនសុវត្ថិវេទី  ​​ យូរ អុន (កម្ពុជសុរិយា ៥១)