~*~ គុនខ្មែរ Khmer Kickboxing ~*~
បង្ហាញតែអំពីក្បាច់គុនបុរាណខ្មែរ
- ល្បុក្កតោ
ល្បុក្កតោ
ខ្មែរមានប្រវត្តិជាពូជអ្នកចំបាំង ពូជអ្នកប្រយុទ្ធ និងពូជអ្នកគុននិយម។ ទឹកដីមហានគរដ៏រុងរឿងដល់កំពូល ក៏ដោយសារបុព្វបុរសខ្មែរជាអ្នកខ្លាំង ពូកែខាងសិល្ប៍សាស្រ្ត និងយុទ្ធសិល្ប៍។ បើតាមកំណត់ត្រាលោក ជីវ តាក្វាន់ បានបញ្ជាក់ថា ខ្មែរពូកែច្បាំង ពិសេសវីរៈមហាក្សត្រខ្មែរ សុទ្ធសឹងជាអ្នកខ្លាំងពូកែធ្វើសឹកសង្គ្រាម។ សឹកសង្គ្រាមសម័យបុរាណ ត្រូវការអ្នកចេះក្បាច់គុន។ តាមរយៈភាពរុងរឿងនៃសម័យមហានគរ បញ្ជាក់ថា ខ្មែរគ្រប់ស្រទាប់ តាំងពីស្តេចដល់រាស្រ្តសាមញ្ញ ពិតជាអ្នកប្រកបដោយទេពកោសល្យខាងក្បាច់គុន យ៉ាងសំបូរបែប។
អ្វីទៅហៅថា ល្បុក្កតោ?
ពាក្យថា៖
ល្បុក្ក = វាយ ឬ ក្បាច់គុន
តោ = សត្វតោ ឬ អនុភាព
រួមសេចក្តីមក ពាក្យថា “ល្បុក្កតោ” មានន័យថាជាកំពូលក្បាច់គុន ប្រកបដោយអនុភាព ឬ ជាក្បាច់គុនខ្លាំងដូចសត្វតោ។
ក្បាច់គុនល្បុក្កតោចែកជា ១២មេ ហើយក្នុងមួយមេៗ មានរាប់រយក្បាច់។
ក្បាច់គុនល្បុក្កតោ ជាព្រលឹងវប្បធម៌ខ្មែរសុទ្ធសាធ ដែលដូនតាខ្មែរយើងបន្សល់ទុកអោយ។ ដូច្នេះដើម្បីអភិរក្សមរតកដែលមិនអាចកាត់ថ្លៃបាននេះ អោយបានគង់វង្ស សូមកូនខ្មែរចូលរួមហ្វឹកហាត់ និងជំរុញការយកចិត្តទុកដាក់ ព្រមទាំងបណ្តុះទឹកចិត្តអោយស្រឡាញ់ក្បាច់គុនខ្មែរ ពិសេសក្បាច់គុនល្បុក្កតោ តាមទិសស្លោក “ខ្មែរហាត់គុនខ្មែរ”៕
