កម្ពុជាធ្លាប់បរាជ័យម្តងរួចមកហើយ ក្នុងការដាក់បញ្ចូលកីឡាល្បុក្កតោ ជាសម្បត្តិបេតិកភណ្ឌមនុស្សជាតិពិភពលោក។ កម្ពុជាមិនអស់សង្ឃឹមនោះទេ ពោលគឺជឿជាក់យ៉ាងខ្លាំងថាអ្វីៗនឹងអាចឆ្ពោះទៅរកផល សម្រេចដូចការគ្រោងទុកទៀតផង ដោយបន្តដាក់សំណើជាថ្មី នៅក្នុងកិច្ចប្រជុំរបស់អង្គការបេតិកភណ្ឌពិភពលោកនៅឆ្នាំក្រោយ ។
ក្បាច់គុនល្បុក្កតោ
ក្បាច់គុនល្បុក្កតោ
ក្រោយការបរាជ័យ ក្នុងគម្រោងដាក់បញ្ចូលជាសម្បត្តិបេតិកភណ្ឌមនុស្សជាតិពិភពលោក មន្ត្រីទទួលបន្ទុកកីឡាល្បុក្កតោកម្ពុជានៅតែបញ្ជាក់ជំហរពុះ ពារដដែល ដើម្បីសម្រេចគោលដៅនេះក្នុងកិច្ចប្រជុំរបស់អង្គការបេតិកភណ្ឌពិភព លោកនៅឆ្នាំក្រោយ ។ កម្ពុជាហាក់សង្ឃឹមជឿជាក់យ៉ាងខ្លាំងថាអ្វីៗនឹងអាចឆ្ពោះទៅរកផល សម្រេចដូចការគ្រោងទុកទៀតផង ។ នេះបើតាមការចុះផ្សាយនៅលើគេហទំព័រ កោះសន្តិភាព។
ដ្បិតតែកាលពីខែមិថុនា ឆ្នាំ២០១៣កន្លងទៅប្រទេសកម្ពុជាបានដើរតួជាប្រធានកិច្ចប្រជុំ គណៈកម្មការបេតិកភណ្ឌពិភពលោករបស់អង្គការ UNESCO ប៉ុន្តែផែនការដាក់បញ្ចូលកីឡានេះឲ្យក្លាយជាបេតិកភណ្ឌមនុស្សជាតិ មួយ នៅតែត្រូវគេធីបចោលដោយក្រុមសមាជិកមកពីប្រទេសដទៃ ។ ការជំទាស់នេះ មិនមែនដោយសារលក្ខខណ្ឌនៃការដាក់បញ្ចូលរបស់កីឡាល្បុក្កតោ នេះនៅខ្វះចន្លោះនោះទេ ប៉ុន្តែគឺហេតុផលបណ្ដាលមកពីសំណើក្នុងពេលនោះមានច្រើន ដែលតម្រូវឲ្យគេជ្រើសរើសយកតែសំណើអាទិភាពយកមកពិភាក្សាមុន ។
មន្ត្រីកីឡាល្បុក្កតោកម្ពុជា សម្ដែងអារម្មណ៍ស្រងាកចិត្តមិនតិចឡើយបន្ទាប់ពីសំណើដាក់បញ្ចូល កីឡាដ៏ចំណាស់របស់ខ្មែរ និងល្បីល្បាញមួយនេះត្រូវគេមើលរំលង ដោយសូម្បីតែកម្ពុជាដើរតួជាប្រធានអង្គប្រជុំក៏ដោយ ។ មុនកិច្ចប្រជុំ មន្ត្រីល្បុក្កតោកម្ពុជា សម្ដែងមោទនភាពលើសលប់ថាផែនការរបស់ខ្លួននឹងបានសម្រេចដោយសារតែ សំអាងថា ទី១កីឡាប្រភេទនេះបានរៀបរយឯកសារស្នើសុំរួចរាល់ ទី២ជាកីឡាដែលចាត់ទុកជាអត្តសញ្ញាណកម្ពុជា និងទី៣ គឺដោយសារតែពេលនោះកម្ពុជាគឺជាប្រធានអង្គប្រជុំ ។ អីុចឹងហើយទើបក្រោយការប្រកាសលទ្ធផលថា សំណើនេះត្រូវគេធីបចោលហាក់ធ្វើឲ្យម្នាក់ៗស្រងាកចិត្ត ។
ក្បាច់ល្បុក្កតា (រូបភាពពី DTN7)
ក្បាច់គុនល្បុក្កតា (រូបភាពពី DTN7)
តាមការដកស្រង់សម្តីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC)បានឲ្យដឹងថា បើទោះជាសំណើសម្រាប់កិច្ចប្រជុំឆ្នាំនេះ ត្រូវបរាជ័យក៏លោកនៅតែមានទឹកចិត្តពុះពារបន្តសំណើនៅកិច្ច ប្រជុំ UNESCO សម្រាប់ឆ្នាំក្រោយទៀតនោះដដែល ។ កម្ពុជាបានដាក់សំណើស្នើសុំជាថ្មីនោះ ច្រើនសប្ដាហ៍មកហើយ ដើម្បីឲ្យឯកសារល្បុក្កតោកម្ពុជាមានអាទិភាពពេញលេញក្នុងកិច្ច ពិភាក្សាក្នុងអង្គប្រជុំ UNESCO ដែលគ្រោងធ្វើឡើងនៅខែមិថុនាឆ្នាំ២០១៤នៅប្រទេសកាតា ដែលជាកិច្ចប្រជុំលើកទី៣៨ខាងមុខ ។ លោកហាក់មានជំនឿថា កិច្ចប្រឹងប្រែងនោះនឹងហុចផលវិជ្ជមានទៀតផងបើទោះជាក្នុងឆ្នាំ ក្រោយ កម្ពុជាមិនធ្វើជាប្រធានអង្គប្រជុំដូចឆ្នាំនេះក្តី ។ លោកឲ្យដឹងថា ក្នុងនាមជាប្រធានអង្គប្រជុំ មិនមែនមានន័យថា អាចអនុម័តសំណើរបស់ប្រទេសខ្លួនឯងតាមអំពើចិត្តនោះទេ ពិសេសបើក្នុងករណីដែលក្នុងកិច្ចប្រជុំនោះមានសំណើច្រើនដែល បង្ខំឲ្យក្រុមគណៈកម្មការសម្រេចយកតែចំនួនខ្លះមកដាក់ជារបៀបវារ ៈពិភាក្សា ។
ក្ដីសង្ឃឹមមួយដែលលោករំពឹងថា កីឡាល្បុក្កតោកម្ពុជានឹងអាចសម្រេចក្នុងកិច្ចប្រជុំឆ្នាំក្រោយនោះ គឺដោយសារសំអាងថា នឹងមានកិច្ចសហការជាមួយសមាគមកីឡាយុទ្ធសិល្ប៍ពិភពលោក (World Martial Arts Union) មានមូលដ្ឋាននៅទីក្រុង Chung Ju របស់ប្រទេសកូរ៉េខាងត្បូងដែលបានទទួលស្គាល់ និងគាំទ្រកីឡារបស់កម្ពុជាមួយនេះរួចទៅហើយ ។ កម្ពុជាបានទាំងឡើងទៅទាក់ទង និងស្នើសុំឲ្យគណៈកម្មការរបស់ប្រទេសកូរ៉េមួយនេះ ផ្ដល់ការគាំទ្រចំពោះកម្ពុជាក្នុងកិច្ចប្រជុំ UNESCOឆ្នាំក្រោយរួចហើយកាលពីពេលថ្មីៗនេះ ។ មហាជនខ្មែរភាគច្រើនលើកឡើងថា គឺជារឿងល្អណាស់ ប្រសិនបើការព្យាយាមដាក់ល្បុក្កតោឲ្យចូលជាសម្បត្តិវប្បធម៌បេតិក ភណ្ឌមនុស្សជាតិអមតក្នុងបញ្ជី UNESCO បានសម្រេច ។
ល្បុក្កតោកម្ពុជាជាក្បាច់គុនកេរដំណែល ដែលមានតម្លៃគ្រប់គ្រាន់ក្នុងការបង្ហាញពីអត្តសញ្ញាណវប្បធម៌ និងជីវភាពរស់នៅនាសម័យដើមរបស់បុព្វបុរសខ្មែរ ។ បើបានសម្រេចកម្ពុជាគ្រោងដាក់បង្ហាញ វិញ្ញាសា ល្បុក្កតោនៅក្នុងព្រឹត្តិការណ៍ស៊ីហ្គេម២០២៣ ដែលពេលនោះកម្ពុជាត្រូវធ្វើជាម្ចាស់ផ្ទះ ៕
អត្ថបទដោយ ៖ សុខភាពកម្ពុជា
ចេញផ្សាយ ៖ ថ្ងៃទី០៦ ខែតុលា ឆ្នាំ២០១៣
ប្រភព:www.healthcambodia.com
