បុណ្យគឺអ្វី? អ្វីគឺបុណ្យ?

ពេលដែលឮសំណួរនេះឡើង ពុទ្ធសាសនិកជនខ្លះច្បាស់ជាស្រមើស្រមៃទៅយ៉ាងឆ្ងាយរហូតស្ទើរហៅ មិនឮមើលមិនឃើញ។ ចម្លើយដោយខ្លីទៅលើសំណួរនេះ ព្រះសម្មាសម្ពុទ្ធជាម្ចាស់ទ្រង់ត្រាស់ថាក្នុងគម្ពីរអង្គុតរនិកាយ សត្តកនិបាត ថា “មា ភិក្ខវេ បុញ្ញានំ ភយិត្ថ សខស្សេតំ ភិក្ខវេ អធិវចនំ យទិទំ បុញ្ញានំ” ប្រែថា «ម្នាល ភិក្ខុទាំងឡាយ! អ្នកទាំងឡាយកុំខ្លាចបុណ្យឲ្យសោះ ម្នាលភិក្ខុទាំងឡាយ ព្រោះពាក្យថា “បុណ្យ” នុ៎ះ មិនគឺអ្វីដទៃឡើយ គឺជាឈ្មោះនៃសេចក្តីសុខ សេចក្តីសុខនោះសោត ក៏ជាឈ្មោះរបស់បុណ្យ។» ដូច្នេះពាក្យថា “បុណ្យ” គឺ “សេចក្តីសុខ” ឯពាក្យថា “សេចក្តីសុខ” គឺ “បុណ្យ”។ ការសន្សំបុណ្យនាំឲ្យបានសេចក្តីសុខ ការសន្សំសេចក្តីសុខនាំឲ្យបានបុណ្យ។ ព្រះសម្មាសម្ពុទ្ធទ្រង់ត្រាស់សំដែងថា “សុខោ បុញ្ញស្ស ឧច្ចយោ” ការសន្សំបុណ្យ នាំមកនូវសេចក្តីសុខ។